புதிதாக திருமணம் ஆனவர்களுக்கு முதல் முறை உறவில் ஈடுபடுவது குறித்து நிறைய எதிர்பார்ப்புகளும் கனவுகளும் அதே சமயம் சில பதட்டங்களும் இருக்கும். அதனால் ஆர்வக் கோளாறில் தவறும் செய்து விடுவதுண்டு. அப்படி முதல் முறை உறவு கொள்ளும்போது எப்படி நடந்து கொள்ள வேண்டும், என்ன செய்யக் கூடாது என்பதைப் பற்றி இங்கே பார்க்கலாம்.


 
                      

உடலுறவு என்பது இன்பம் தரக்கூடியது தான். ஆனால் அதை உடல் ரீதியான இன்பம் என்று மட்டும் எண்ணக்கூடாது. அதில் மனம் சார்ந்த விஷயங்களும் உண்டு. அதிலும் முதல் முறை உடலுறவில் ஈடுபடும்போது இன்னும் கூடுதல் கவனத்துடன் இருக்க வேண்டும். பயம், பதட்டம், அதிக ஆர்வம் எல்லாம் மேலோங்கி இருக்கும் முதல் உறவு பற்றி தெரிந்து கொள்ள வேண்டிய விஷயங்கள் குறித்து பார்ப்போம்.

​இருவரின் விருப்பம்

உறவில் ஈடுபடும் முன் இருவருக்கும் அதில் நாட்டம் இருக்க வேண்டும். இல்லையென்றால் முதல் முறையே உங்களுக்கு சலிப்பூட்டக் கூடியதாக ஆகிவிடும்.

திருமணம் முடிந்த அதேநாளில் முதல் முறை உறவு கொள்ள நேர்ந்தால், யாருக்கேனும் உடல் அசதி இருக்கலாம். அதனால் ஒருவரை இன்னொருவர் உறவுக்குக் கட்டாயப்படுத்தாமல் இருப்பது நல்லது.

​ஆணுறை

திருமணம் முடிந்து உடனடியாகக் குழந்தைப் பெற்றுக் கொள்ள விருப்பம் இல்லாதவர்கள் எந்த தயக்கமும் இன்றி, ஆணுறையைப் பயன்படுத்துவது தான் நல்லது.

இது தேவையற்ற மனக்குழப்பத்தைத் தவிர்க்கும். உறவும் இனிமையாக இருக்கும்.

​ஆர்வத்தை தூண்டுவது

படுக்கையறையில் அசௌகரியமாக இருக்கக்கூடாது. பதட்டத்தைத் தவிர்த்து விட்டு, ஒருவரை ஒருவர் சௌகரியமாக, இணக்கமாக வைத்துக் கொள்ள வேண்டும்.

அப்போது தான் உறவின் மீது ஆர்வம் அதிகரிக்கும். அதேபோல எடுத்ததும் ஆர்வக் கோளாறாகவும் நடந்து கொள்ளாமல் மெதுவாகத் தொடங்கி, துணையின் ஆர்வத்தைத் தூண்டுங்கள்.

​உரையாடல் முக்கியம்

புதிதாக வாழ்க்கையைத் தொடங்குபவர்கள் படுக்கையறையிலும் ஒருவருக்கொருவர் மனம் விட்டுப் பேசிக் கொள்வது மிக முக்கியம்.

இருவருக்கும் யாருக்கு என்ன பிடிக்கும் என மனம் விட்டுப் பகிர்ந்து கொள்ளுங்கள்.

​அதிக கற்பனை

முதல் முறை உறவில் ஈடுபடும் போது, இருவரும் ஒருவரை ஒருவர் நெருங்கி, பிடித்ததைப் புரிந்து கொண்டு நடப்பது தான் சரி.

நம் துணைக்கு இது பிடிக்கும் என நீங்களாக ஒரு தனிப்பட்ட கற்பனையுடன் நடந்து கொள்ளாதீர்கள். நீங்கள் செய்வது உங்கள் துணைக்குப் பிடிக்காமலோ புரியாமலோ போனால் அதில் சுவாரஸ்யம் இருக்காது.

​அதிக எதிர்பார்ப்பு

கட்டிலுக்குப் போனதும் தன்னுடைய துணை இப்படி நடந்து கொள்ள வேண்டும், இதை செய்ய வேண்டும் போன்ற அதிக எதிர்பார்ப்புகளை மனதுக்குள் வைத்துக் கொண்டு நடந்து கொள்ளாதீர்கள்.

அதிகப்படியான எதிர்பார்ப்பு ஏமாற்றத்தைத் தரும்.

​பொசிஷன்கள்

முதல் முறை உறவின் போது இயல்பாக உங்களுடைய கலவியைத் தொடங்குங்கள். முதல் முறையே தீவிரமான உடலுறவு பொசிஷன்களை முயற்சி செய்தீர்கள் என்றால் உங்கள் துணைக்கு தயக்கம் இருக்கலாம்.

அல்லது நீங்கள் முயற்சி செய்யும் பொசிஷனில் நீங்களே கூட சொதப்பிவிட நேரிடும். அதனால் அந்த ரிஸ்க்குகளை தவிர்ப்பது நல்லது.